Kunstnarleg utviklingsarbeid

Utøvande kunst og akademia

Programområdet for kunstnarleg forsking ønsker å bidra til sterkare band mellom akademia og kunstfeltet i seg sjølv (bransjen), og introduserer derfor forskingsomgrepet som eit alternativ til utviklingsarbeid. Vi viser med dette òg tilknytinga til ein internasjonal diskurs.

Kunstnarleg forsking

Kunstnarleg forsking famnar sentrale element i utøvinga av musikk og dans. I begge kunstartane, uavhengig av stilval, vil ei framsyning bygga på tradisjon og eksisterande kunnskap, men òg på innovasjon og transdisiplinaritet.

Framsyninga og det utøvande perspektivet kan skiljast frå andre hendingar gjennom identiteten til det kunstnarlege uttrykket. Den temporære kunstopplevinga vil gi grunnlag for den vidare kunnskapsutviklinga gjennom nyskaping, refleksjon og undervising.

Uttrykk i prosess - frå idé til handling

Når ein forskar på kunstnarleg arbeid gjennom framsyningsperspektivet er det derfor nødvendig med eit kunnskapsomgrep som omfattar mangfaldet til det kunstnarlege uttrykket, og som samtidig tar høgde for handverket, evnedimensjonen, innovasjon, og dei ulike tradisjonanes skriftlegheit, dokumentasjon og formidling. Dette er kunstnarlege uttrykk i prosess – frå idé til handling – slik vi finn det på noter, på plater, konsertar og framsyningar knytta til kroppsleggjeringa av det å spela eit instrument eller å dansa.